सन्तोष गौतम, म्याग्दी २०७० भदौ १५ । छटौ राष्ट्रिय पुस्तकालय दिवसको अवसरमा शनिबार बेनीमा विभिन्न कार्यक्रम सम्पन्न भएको छ । दिवसको अवसरमा बेनीमा प्रभातफेरी, पुस्तकालय विकास सम्बन्धि अन्तरक्रिया र जिल्ला कारागार शाखाका कैदी बन्दीहरुलाई खेलकुदका सामाग्री हस्तान्तरण गरिएको हो ।
दिवसको अवसरमा म्याग्दी सामुदायिक पुस्तकालय, गाजा युवा क्लब र जिल्ला पुस्तकालय सञ्जालले संयुक्त रुपमा बेनीमा आयोजनामा भएको अन्तिरक्रिया कार्यक्रमका सहभागिले शैक्षिक विकासका लागि पुस्तकालय स्थापना, व्यवस्थापन र दिगो सञ्चालनको आवश्यकतामा जोड दिएका छन् ।
कार्यक्रममा प्रमुख जिल्ला अधिकारी चन्द्रबहादुर कार्की र स्थानीय विकास अधिकारी बिष्णुप्रसाद शर्माले समाजको शैक्षिक उन्नतीका लागि सबै विद्यालय र गाउँमा पुस्तकालय स्थापना हुनु आवश्यक रहेको भन्दै स्थापित पुस्तकालायलाई व्यस्थित बनाउनुपर्नेमा जोड दिए ।
म्याग्दी सामुदायिक पुस्तकालयका अध्यक्ष सन्तोष रावलको अध्यक्षता, गाँजा युवा कल्वका म्याग्दी प्रमुख हरिकृष्ण गौतमको सञ्चालन र पुस्तकालयकी उपाध्यक्ष तिर्थकुमारी श्रेष्ठको स्वागतमा सम्पन्न कार्यक्रममा नागरीक समाजका संयोजक सुर्दशनकुमार श्रेष्ठ, नेपाल पत्रकार महासंघ म्याग्दी शाखाका अध्यक्ष सुरज केसी र जिल्ला पुस्तकालय सञ्जालका अध्यक्ष भक्त कार्कीले मन्तव्य व्यक्त गरेका थिए ।
अन्तरक्रिया अघि बेनीमा विभिन्न कार्यालय प्रमुख, नागरीक समाज, संघ संस्थाका प्रतिनिधी, शिक्षक र विद्यार्थीहरुको सहभागीतामा प्रभातफेरीको समेत आयोजना गरिएको थियो । यसैगरी पुस्तकालय दिवसको अवसरमा जिल्ला कारागार शाखा म्याग्दीका कैदीबन्दीलाई म्याग्दी सामुदायीक पुस्तकालयले दुई थान भलीबल, एक थान नेट र एक थान शब्दभण्डार पुस्तक उपलब्ध गराएको छ ।
प्रजिअ चन्द्रबहादुर कार्की, स्थानीय विकास अधिकारी बिष्णुप्रसाद शर्मा, सहायक प्रजिअ तुलसीराम भण्डारी, प्रहरी नायव उपरीक्षक कृष्णबहादुर पल्लीमगर, नागरिक समाजका संयोजक सुर्दशनुकमार श्रेष्ठ लगायतले कैदीबन्दीका चौकीदार गोविन पुनलाई खेलकुद सामाग्री हस्तान्तरण गरेका थिए ।
source:ebaglung.com