तनहुँ- एसएलसी परिक्षा केन्द्र पायक नपरेको भन्दै जिल्लाका देवघाट, छिपछिपे, कोटा र देउराली गाविसका बासिन्दाले गाउँमा परिक्षा केन्द्र स्थापनाका लागि माग गरेका छन्। चार गाविसका राजनीतिक दल, प्रधानाध्यापक, शिक्षक, अभिभावकसहितको टोलीले देवघाटमा एसएलसीको परीक्षा केन्द्र कायम गर्न माग गरेका हुन्।
जिल्लाका दुर्गम गाविसका रुपमा रहेका छिपछिपे,कोटा र देउराली गाविसका विद्यार्थीलाई परिक्षाका लागि आँबुखैरेनी झर्दा धेरै खर्च लाग्ने गरेको र आवतजावतमा समेत समस्या भएको शिवराज पौडेलले बताए। 'टाढा जानुपर्दा यस भेगका विद्यार्थीलाई आर्थिक भौतिक र सामाजिक समस्या भोग्न बाध्य छन्।' उनले भने, 'गाउँमा परिक्षा केन्द्र स्थापना भए, विद्यार्थीलाई निकै सजिलो हुने थियो।'
कोटा, छिपछिपे, देउराली र देवघाट गाविसमा सञ्चालित ८ माध्यमिक विद्यालयका विद्यार्थीले २०५५ र २०५६ सालमा देवघाटस्थित कालिका उच्च माध्यमिक विद्यालयबाट एसएलसीको परिक्षामा सहभागि भएका थिए। शान्ति सुरक्षाका कारण देखाउँदै २०५७ सालदेखी आँबुखैरेनी स्थित रामशाह उच्च माध्यमिक विद्यालयमा स्थानान्तरण गरिएको एसएलसी परीक्षा केन्द्र २०६३ सालदेखी पुनः देवघाटमै सारिएको थियो।
'२०६७ सालदेखी पुनः परिक्षा केन्द्र आँबुखैरेनीमा सारियो' बज्रयोगिनी माध्यमिक विद्यालयका प्रधानाध्यापक ऋषिप्रसाद घिमिरेले भने, 'अहिलेको अवस्थामा पनि परिक्षार्थीले परिक्षा दिन सास्ती व्यहोर्नु परेको छ।' ४ गाविसका प्रतिनिधीले बिहीबार प्रमुख जिल्ला अधिकारी एवं माध्यमिक शिक्षा उत्तीर्ण परीक्षा समन्वय समितिका अध्यक्ष शंकरप्रसाद खरेललाई ज्ञापनपत्र बुझाउँदै देवघाटमै एसएलसी परिक्षा केन्द्र स्थापनाका लागि माग गरे।
परीक्षा नियन्त्रण कार्यालयको निर्देशिका अनुसार एसएलसी परिक्षा मर्यादित हुने स्थानमा परिक्षा केन्द्र स्थापना गर्न सकिने जिल्ला शिक्षा अधिकारी एवं जिल्ला परिक्षा समन्वय समितिका सदस्य सचिव हरि गौतमले बताए। 'परीक्षा मर्यादित हुने स्थानमा परीक्षा केन्द्र सञ्चालन गर्न सकिन्छ,' उनले भने, 'जिल्ला परिक्षा समन्वय समितिको बैठक बसेर त्यस विषयमा निर्णय गरिन्छ।'