दमौली: कक्षामा सोध्दा नजानेको भन्दै दोभान बोर्डिङ स्कुल क्यामिन कलेस्तीकी एक शिक्षिकाले १० वर्षीया अस्मिता थापामगरलाई दुवै हात पछाडि बाँधेर सजाय दिँदा बालिकाको देब्रे हात भाँचिएको छ। शिक्षिका सरिता गुरुङले कक्षा ४ मा पढ्ने ती बालिकालाई सोध्दा नजानेपछि टाईले पछाडि दुबै हात बाँधेर सजाय दिँदा सो हात भाँचिएको पीडित परिवारले आरोप लगाएको छ।
छोरीलाई पढाउँदा नजानेको भन्दै चरम यातना दिँदा त्यस्तो स्थिति आएको बालिकाकी आमा बुधीमायाले बताइन्। गत मंगलबार छोरीलाई ती शिक्षिकाले यातना दिए पनि घरपरिवारले शुक्रबार मात्रै पत्रकारलाई घटनाबारे टेलिफोन गरी बताएका थिए। सोही दिन छोरीको पोखरास्थित मेट्रोसिटी अस्पतालमा उपचार गरिएको जानकारी बुधीमायाले दिइन्। डाक्टरले नसा च्यापिएको बताएको उनले बताइन्।
‘त्यस दिन त देब्रे हातका औँला नै चलेका थिएनन्, अहिले बिस्तारै चल्न थालेको’, उनले बताइन्। सजाय दिने बाहनामा बालिकालाई निर्वस्त्रसमेत पारेको आरोप पीडित पक्षले लगाएको छ। शुक्रबार विद्यालयमा बसेको व्यवस्थापन समितिको बैठकले उल्टै विद्यार्थीको गल्ती देखाउँदै शिक्षिकालाई चोख्याउने प्रयास गरेपछि पीडित पक्ष आक्रोशित हुँदै घटनाबारे पत्रकारहरूलाई जानकारी गराउन बाध्य भएको बताइएको छ। विद्यालयका प्रिन्सिपल सिकन्दर गुरुङले शिक्षिकाले बालिकालाई सोध्दा नजानेपछि सामान्य सजाय मात्रै दिएको बताए। घटना मिलाइसकेको दाबी समेत उनले गरे।
Source:http://annapost.com/opinion/news7756