म्याग्दी , कात्तिक ८ । म्याग्दीको राखु पिप्ले मौवाफाँटमा रहेको ज्ञानोदय माविद्धारा सञ्चालित दृष्टिबीहिन स्रोत कक्षालाई म्याग्दी प्रवासी नेपाली संघ (मोना) हङकङले शुक्रबार आर्थिक सहयोग हस्तान्तरण गरेको छ ।
भदौ २ गते हङकङमा आयोजना भएको सांस्कृतीक कार्यक्रम मार्फत बचत भएको ३३ लाख रुपैया मध्य दृष्टिबिहिन स्र्रोत कक्षालाई ११ लाख रुपैया उपलब्ध गराइएको हो । यसअघि बगुवाखोलाको बालजागृती प्राबिमा सञ्चालित बौद्धीक आपङ्गता स्रोत कक्षालाई ११ लाख रुपैया उपलब्ध गराइसकेको मोना हङकङले सिंगाको बहिरा स्रोत कक्षालाई पनि ११ लाख रुपैया सहयोग गर्ने जनाएको छ ।
सो रकम स्रोत कक्षाका विद्यार्थीको भरण भोषण र पुर्वधार निर्माणका लागि खर्च गर्ने गरि सम्बन्धित विद्यालयका प्रअ, मोना म्याग्दीका अध्यक्ष र जिल्ला शिक्षा कार्यालयका प्रतिनिधीको हस्ताक्षरमा सञ्चालन हुनेगरि अक्षयकोषको रुपमा स्थापना गरिएको छ ।
मोना म्याग्दीका अध्यक्ष सुवासकुमार श्रेष्ठको अध्यक्षता, सदस्य रमेश गिरीको सञ्चालन र ज्ञानोदय माविका विद्यालयका प्रअ निलकण्ठ शर्माको स्वागत मन्तव्यमा कार्यक्रम सम्पन्न भएको थियो । कार्यक्रममा बोल्दै प्रमुख अतिथि मोना हङकङका अध्यक्ष दल शेरपुञ्जाले सहयोग रकमको सदुपयोग गर्न आग्रह गर्दै यसबाट फरक क्षमत्ता भएका बालबालिकाको शिक्षामा पहुँच वृद्धी हुने अपेक्षा व्यक्त गरे ।
कार्यक्रममा ज्ञानोदय मोनाका संस्थापक प्रकाश पुन, माविका विद्यालय व्यवस्थापन समितिका अध्यक्ष अर्जुन सुवेदी, स्थानीय अगुवा बालकृष्ण सुवेदी, गाविस सचिव दयाराम पौडेल, मोना युकेका सल्लाहकार दुतबहादुर गर्बुजा, मोना युकेका बरिष्ठ उपाध्यक्ष कमल पुर्जा र एनआरएन बेलायतका महासचिव योगकुमार फगामीले मन्तव्य व्यक्त व्यक्त गरेका थिए ।