शिक्षकले राजनीति गर्ने भए पेशा त्याग्न सक्नुपर्छ- व्दारे

बागलुङ २०७० कात्तिक ७ । क्षेत्रीय शिक्षा निर्देशनालय पश्चिमाञ्चलका निर्देशक विष्णुबहादुर द्वारेले शिक्षक आफ्नो पेशाप्रति जिम्मेवार नभएसम्म बिद्यालयको शैक्षिक गुणस्तर सुधार्न नसकिने बताएका छन् ।

क्षत्रीय शिक्षा निर्देशनालय पोखराकोले आज बागलुङमा आयोजना गरेका शैक्षिक सुधारका लागी संचार माध्यमसँगको सहकार्य बिषयक अभिमुखीकरण गोष्ठीमा बोल्दै द्वारेले बिद्यालयको शैक्षिक सुधारमा भौतीक संरचना भन्दा शिक्षकको कार्य कुशलताले महत्वपूर्ण भूमिका खेल्ने बताए ।

राज्यको कोषबाट तलव खाएर राजनितीक दलका काम गर्न नमिल्ने बताउँदै उनले भने राजनीति गर्ने भए पेशा त्याग्न सक्नुपर्छ । सामुदायीक बिद्यालयका अधिकांश शिक्षक जिम्मेवार नभएकाले शैक्षिक गुणस्तर सुधार्न गाह्रो भएको उनको गुनासो थियो ।

द्वारेले शिक्षाको गुणस्तर विकासका लागी संचार माध्याम र पत्रकारहरुले खेलेको भुमिकाको प्रशंसा गर्दै आवश्यक ठाउँमा सुझाव दिन र खवरदारी गर्न पत्रकारहरुलाइ आग्रह पनि गरे ।

कार्यक्रममा बोल्दै पत्रकार महासंघ बागलुङका अध्यक्ष राम बहादुर जिसीले निर्देशनालयले संचार माध्यामसँग सहकार्य गर्ने गरी कार्यक्रमहरु ल्याउनु पर्ने बताए । गोष्ठीमा बागलुङका क्रियाशिल पत्रकारहरुको सहभागीता रहेको थियो । गोष्ठीको सहजिकरण निर्देशनालयका उपसचिव केशरीरमण न्यौपानेले गरेका थिए ।