भूमिराज शर्मा
पर्वत, १० कार्तिक ।
जिल्ला शिक्षा कार्यालय पर्वतले चालु आर्थिक बर्ष ०७०/७१ का लागि तयार गरिएको बार्षिक कार्यक्रमको अभिमुखिकरण आइतबार सरोकारवालाहरुबीच सम्पन्न गरेको छ । यस आर्थिक बर्षमा जिल्लाको शिक्षाका लागि नेपाल सरकार शिक्षा मन्त्रालयले कुल ७४ करोड ३० लाख १७ हजार लगानी गर्ने भएको हो ।
अभिमुखीकरण कार्यक्रममा जिशिका पर्वतले दिएको जानकारी अनुसार बाल विकास तथा शिक्षाका लागि १ करोड २२ लाख ९० हजार, विद्यालय शिक्षामा पहुँचको सुनिश्चितताका लागि ६ करोड ३ लाख ८२ हजार, साक्षरता तथा निरन्तर शिक्षा तर्फ ५३ लाख ९७ हजार, शैक्षिक गुणस्तर अभिबृद्धिका लागि १ करोड ६७ लाख ३२ हजार, शिक्षक शिक्षा तथा विकास तर्फ ८४ लाख ८० हजार, प्रभावकारी सेवा प्रवाहका लागि क्षमता अभिबृद्धि तर्फ ३० लाख ८० हजार, विद्यालय व्यवस्थापन तथा अनुगमन तर्फ ८९ लाख ५९ हजार, प्रोत्साहन तथा सहयोग तर्फ २ करोड २३ लाख ८९ हजार र विद्यालयहरुलाई प्रति विद्यार्थी लागतको आधारमा नन् स्यालरी अनुदान सहयोग ४ करोड ५ लाख ३९ हजार गरी चालु कार्यक्रमको जम्मा खर्च १७ करोड ८३ लाख ५७ हजार विनियोजन गरिएकोे छ ।
त्यसै गरी पुँजीगत तर्फ भौतिक सुविधा विस्तार कार्यक्रमका लागि २ लाख ८० हजार खर्च गरिने भएको छ । अन्य बाँकि ५६ करोड ४३ लाख ८० हजार रकम शिक्षक कर्मचारीहरुको तलबमा खर्चिने बताइएको छ । जिल्ला बिकास समिति, बिभिन्न गैहसरकारी सस्थाहरु, नेपाल सरकारका अन्य बिभाग, मन्त्रालय, ब्यक्तिले गर्ने लगानी यसमा समाबेश नगरिएको जिल्ला शिक्षा कार्यालयका उपसचिब कुस्मराज उपाध्यायले बताउनु भयो । कार्यक्रममा प्रस्तुत गरिएको जानकारी अनुसार जिल्लामा प्रति बिद्यार्थी बार्षिक १५ हजार ३ सय ७८ रुपैया खर्च हुने भएको छ ।
यस बर्ष जिल्लाका ३ सय ३१ सामुदायिक र ४१ संस्थागत समेत कुल ३ सय ७२ विद्यालयमा कक्षा १ देखि १२ सम्म २४ हजार ७० छात्रा र २४ हजार २ सय ४४ छात्र गरी ४८ हजार ३ सय १४ जना बिद्यार्थी अध्ययनरत छन भने साक्षरता प्रतिशत ७३.८५ प्रतिशत रहेको छ । जिल्लाका १ हजार ९ सय ८४ दरबन्दीमा शिक्षकहरु कार्यरत रहेको जिल्ला शिक्षा कार्यालय पर्वतले जानकारी दिएको छ ।
जिल्ला शिक्षा अधिकारी घनश्याम पौडेलको अध्यक्षतामा सम्पन्न कार्यक्रमको संचालन विद्यालय निरीक्षक टेक प्रसाद पाण्डे र सहभागीहरुलाई स्वागत तथा कार्यक्रमको अभिमुखीकरण उपसचिव कुस्मराज उपाध्यायले गर्नु भएको थियो ।