अर्घाखाँची मङ्सिर १३ गते । उच्चशिक्षा हासिल गर्ने अर्घाखॉचीका विद्यार्थीमध्ये अधिकांश विद्यार्थी शिक्षा शास्त्र संंकायमा आकर्षित भएका छन् । उच्चशिक्षा अध्ययनपछि रोजगारीको समेत ग्यारेन्टी भएका कारण यहाँका विद्यार्थी शिक्षा शास्त्र संकायप्रति आकर्षित भएका हुन् ।
जिल्लामा सञ्चालित पाँचवटा क्याम्पसहरूमध्ये पाणिनि बहुमुखीबाहेकका अन्य सबै क्याम्पसमा शिक्षा शास्त्र संकायको मात्र पठनपाठन हुने गरेको छ । बी.एड.को अध्ययन पूरा गरेपछि सरकारी तथा निजी शिक्षण सङ्घ संस्थाहरूमा शिक्षकको जागिर पाइने भएकोले बी.एड. पढ्न थालेको विद्यार्थी बताउँछन् । जिल्लामा हालसम्म बी.एड. पूरा गरेका विद्यार्थीमध्ये ७५ प्रतिशतभन्दा बढी विद्यार्थी शिक्षण पेसामा आबद्ध छन् ।
बाँकी २५ प्रतिशतमध्ये पनि अधिकांशले कुनै न कुनै किसिमको रोजगारी गर्दै आएको जनाइएको छ । अन्य विषयहरूभन्दा पढ्न सजिलो र पढिसके पछि रोजगारीको लागि पनि सजिलो भएकोले बी.एड.मा विद्यार्थीको चाप बढेको प्राध्यापकहरूको भनाइ छ । अर्घाखाँची जिल्लाको सबैभन्दा जेठो र एकमात्र बहुमुखी क्याम्पस पाणिनी बहुमुखी क्याम्पसमा स्नातक तहमा करिब पाँच सय विद्यार्थीले अध्ययन गर्दै आएका छन् । अध्ययनरत विद्यार्थीहरूमध्ये करिब ९० प्रतिशत विद्यार्थीले शिक्षा शास्त्र, नौ प्रतिशत विद्यार्थी व्यवस्थापन संकाय र केवल १ देखि २ प्रतिशत विद्यार्थीमात्रै मानविकी संकायमा भर्ना भएका छन् ।