भूमिराज शर्मा
पर्वत, १४ पुस
जिल्लाको खुर्कोट गाविसमा रहेको हिमालय उमाविको ४८ औ बार्षिकोत्सव तथा अभिभावक दिवस एक भव्य समारोहकाबीच आइतबार सम्पन्न भएको छ । सो कार्यक्रमको प्रमुख अतिथिको रुपमा बोल्दै पर्वतका जिल्ला शिक्षा अधिकारी घनश्याम पौडेलले सामुदायिक विद्यालयको स्तर उन्नतिका लागि शिक्षक विद्यार्थी, अभिभावक लगायत सम्बन्धित सबै सरोकारवालाहरु क्रियाशील हुनुपर्ने विचार व्यक्त गर्नुभयो । सामुदायिक विद्यालयमा राज्यले पर्याप्त लगानी गरेको भए पनि प्रतिफल सन्तोषजनक हुन नसकेको पौडेलले बताउनु भयो ।
कार्यक्रममा स्रोतव्यक्ति सुभन्तनाथ सुवेदी, शिक्षक युनियन पर्वतका अध्यक्ष हिरादेवी शर्मा, पाङ गाविसका पूर्व अध्यक्ष हेम शर्मा पौडेल, समाजसेवी गंगाधर पौडेल, विद्यालयका पूर्व प्राचार्य द्रोणराज उपाध्याय, गाविस सचिव तीर्थ प्रसाद शर्मा, पूर्व विव्यस अध्यक्ष शेषराज रेग्मी, कालिका माविका प्रअ बाबुराम शर्मा, भूपु शिक्षक गुप्तनिधि शर्मा, भूपू विद्यार्थी समाजका अध्यक्ष आनन्दराज पौडेल, लगायतले मन्तव्य व्यक्त गर्नु भएको थियो ।
विद्यालयका प्रअ माधवराज रेग्मीले आयव्यय तथा बार्षिक प्रगति प्रतिवेदन प्रस्तुत गर्नु भएको सो समारोहमा बिद्यार्थीहरुले विविध सांस्कृतिक कार्यक्रमहरु समेत प्रस्तुत गरेका थिए । विद्यालय व्यवस्थापन समितिका अध्यक्ष सूर्यकान्त शर्माको अध्यक्षतामा सम्पन्न कार्यक्रमको संचालन शिक्षक बालकृष्ण बाँस्तोलाले गर्नु भएको थियो भने सहभागीहरुलाई स्वागत शिक्षक झलकराज रेग्मी, बिद्याथीहरु प्रविणा सुवेदी र अंगद बहादुर पौडेलले गर्नु भएको थियो ।
जिल्लाकै प्रतिष्ठित विद्यालयको रुपमा ख्याति कमाएको उक्त विद्यालयले विगत केही बर्ष यता एसएलसी परीक्षामा लगातार विशिष्ट श्रेणी सहित उत्कृष्ट नतिजा हासील गर्दै आएको छ भने शैक्षिक गुणस्तर अभिबृद्धिका लागि विद्यालयमा पर्याप्त शिक्षकहरु हुँदाहुदै पनि निजी स्रोतमा शिक्षकहरु नियुक्त गरी कक्षा चार सम्म अंगे्रजी माध्यममा कक्षा संचालन गरिरहेको छ ।