सन्तोष गौतम, म्याग्दी २०७० पुष १४ । म्याग्दीको पुलाचौर गाविसमा रहेका तीन वटा विद्यालयलाई एकै ठाउँमा गाभ्ने तयारी भएको छ ।
पुलाचौर गाविसको ५ र ६ नम्बर वडामा रहेका तीन वटा विद्यालयमा विद्यार्थी संख्या न्युन भएपछि विद्यालय व्यवस्थापन समितिको संयुक्त भेलाले विद्यालय एकिकरण गरेर तह थप गर्न पहल गर्ने निर्णय गरेको हो ।
पुलाचौर ५ मा रहेको जगन्नाथ प्राबि नयाँगाउँ, जगन्नाथ प्राबि गाजने र ६ नम्बर वडाको डिम्ब प्राबि चिप्लेटीलाई एकीकरण गर्न समुदायमा छलफल गरि आवश्यक प्रक्रिया अघि बढाइएको विद्यालय एकिकरणका लागि गठित समितिका अध्यक्ष चन्द्रबहादुर पाईजाले बताए ।
विद्यार्थी संख्या कम भएको, भौगोलिक हिसावले नजिक पर्ने र तह थप गर्नुपर्ने आवश्यकता भएकाले विद्यालय गाभ्न लागिएको पाईजाले बताए । हाल चिप्लेटी गाउँको डिम्ब प्राविमा ३७, गाजनेको जगन्नाथ प्राविमा १२ र नयाँगाउँको जगन्नाथ प्राविमा ३८ जना विद्यार्थी रहेका छन् ।
डिम्ब प्रावि चिप्लेटी र जगन्नाथ प्रावि नयाँगाउँमा ३÷३ जना दरबन्दीका शिक्षक र एकएक जना निजि स्रोतका शिक्षक छन भने जगन्नाथ प्रावि गाजनेमा २ जना दरबन्दीका र एकजना बालकक्षाको दरबन्दी रहेको छ । अध्यक्ष पाईजाले तिन वटै विद्यालयलाई एकिकरण गरि निमावी र मावि तहको कक्षा सञ्चालन गर्न पहल गरिएको बताए ।
आधा घण्टाको दुरीमा पर्ने विद्यार्थी संख्या न्युन भएका र विद्यार्थीहरु सहजै विद्यालय जानआउन सक्ने भौगोलिक अवस्था भएका ठाउँका विद्यालयहरु गाभ्न सकिने जिल्ला शिक्षा कार्यालयले जनाएको छ । जिल्ला शिक्षा अधिकारी बिष्णुनारायण श्रेष्ठले समुदाय र विद्यालय व्यवस्थापन समितिले निर्णय गरेर आएमा विद्यालय गाभ्ने अनुमती दिन सकिने बताए ।
source:ebaglung.com