काठमाडौ, माघ १४ - चित्रकार ज्योतिप्रकाश बिके पाँच वर्षअघि विदेशबाट रंग बोकेर फर्केका थिए । रोजगारीका लागि विदेश गएका उनले कोसेलीको रूपमा रंग लिएर आएका थिए । तिनै कोसेली रंगले कोरिएका चित्रहरू यति बेला उनले प्रदर्शनीमा राखेका छन्, आफ्नै गाउँको स्कुललाई सघाउन । बिदेसिएकाको पीडामाथि गत वर्ष पनि एकल चित्र प्रदर्शनी गरेका ३८ वर्षे ज्योतिको यो चौथो एकल प्रस्तुति हो । ठमेलस्थित मिथिला येँ ग्यालरीमा 'इलिगेन्स' शीर्षकमा उनका २१ सिर्जना सजिएका छन् । आफ्नो जन्मथलो नवलपरासी, डेडगाउँ-५ मा रहेको अकेलादेवी प्राथमिक विद्यालयलाई सहयोगार्थ उनले प्रदर्शनी गरेका हुन् । अहिलेसम्म ७० हजार रुपैयाँको चित्र बिक्री भइसकेको उनले जनाए । प्रदर्शनीमा राखिएका चित्र अर्धमूर्त छन् । मिक्स मिडियाको प्रयोग गरेर उनले परम्परागत भौतिक सम्पदाको महत्त्व झल्काएका छन् । कलाकार एवं समीक्षक केशवराज खनालले ज्योतिको चित्रमा शालीनता झल्किने दाबी गरे ।
मन्दिर, पुराना शैलीका घर र पुरानो नेपालको प्रतिविम्ब उनको चित्रमा पाइन्छन् । जीवन्त महसुस गराउन उनले सबैजसो चित्रमा टेक्स्चर प्रयोग गरेका छन् । करिब ६० दलित बालबालिकाले स्कुलमा अध्ययन गर्ने स्कुललाई सहयोग गर्ने चाहना पहिलेदेखि नै भए पनि यसपटक चित्र प्रदर्शनीको संयोग मिलाइएको ज्योतिले बताए । माघ १४ सम्म चल्ने प्रदर्शनीमा ७ हजारदेखि १० हजार रुपैयाँका चित्र छन् ।