चितवन, माघ १४ गते । नेपथ्य साङ्गीतिक समूहले मङ्सिर महिनामा शान्तिका लागि शिक्षा भन्ने नारासहित चितवनमा सञ्चालन गरेको साङ्गीतिक यात्राबाट उठेको रकम आज एक विद्यालयलाई हस्तान्तरण गरिएको छ ।
पूर्वी चितवनको रत्ननगरमा रहेको पञ्चकन्या उच्च माविमा विज्ञान सङ्कायको विकासका लागि रु एक लाख ८५ हजार रकम हस्तान्तरण गरिएको आयोजक रोट्राक्ट क्लब अफ रत्ननगरकी अध्यक्ष सङ्गीता आचार्यले बताउनुभयो ।रत्ननगरको पञ्चकन्या उच्च मावि सरकारीस्तरमा चितवन जिल्लामै पहिलो विज्ञान सङ्कायको पढाइ सञ्चालन गर्ने उच्च मावि हो । उक्त रकमले विज्ञान सङ्कायको प्रयोगशालामा चाहिने सामग्री खरिद गर्ने विद्यालयले जनाएको छ ।
नेपथ्यले यहाँको रत्ननगरमा पुस २१ गते साङ्गीतिक कार्यक्रम सञ्चालन गरेको थियो । नेपथ्यले देशका विभिन्न १० जिल्लामा साङ्गीतिक यात्रा सम्पन्न गरेको छ ।
रत्ननगरको नारायणी चलचित्र मन्दिर नेपथ्यका प्रमुख गायक अमृत गुरुङसहितको टोलीले आफ्नो सङ्गीत प्रस्तुत गरेको थियो । स्थानीय रोटरी क्लब, रोट¥याक्ट क्लब, रत्ननगर उद्योग वाणिज्य संघ र रत्ननगर नगरपालिकाको संयुक्त आयोजनामा कार्यक्रम भएको हो ।
कार्यक्रमबाट रु चार लाख १० हजार सङ्कलन भएको र प्राविधिक खर्च कटाएर बाँकी रहेको रु एक लाख ८५ हजार रकम विद्यालयलाई उपलब्ध गराइएको हो ।
यसअघि धान्याञ्चल महायज्ञ लगाएर रु दुई करोड सङ्कलन भएपछि विज्ञान सङ्काय सुरु गरेको यस उच्च माविमा अहिले रकम अभाव रहेको प्राचार्य मेघनाथ दवाडीले बताउनुभयो ।
नेपथ्यले यसवर्ष रत्ननगरसँगै तनहुँ, कास्की, कपिलवस्तु, मोरङ, सर्लाही, झापा, बर्दिया र काठमाडौँमा कार्यक्रम गरेको र उठेको रकम शैक्षिक विकासका लागि खर्च गर्ने घोषणा गरेको छ ।