कञ्चनपुर, माघ १६ गते । कञ्चनपुरका निरक्षरलाई तीन महिनाभित्र साक्षर बनाइने शिक्षा कार्यालय कञ्चनपुरले जनाएको छ । निमित्त शिक्षा अधिकारी अमरराज भट्टले कञ्चनपुरका ४५ हजार निरक्षरलाई तीन महिनाभित्र साक्षर बनाइने जानकारी दिनुभयो ।
उहाँका अनुसार १५ वर्ष भन्दामाथिका निरक्षर महिला र पुरुष दुवैलाई साक्षर बनाइनेछ । त्यसका लागि सबै क्षेत्रमा कक्षा सञ्चालन भइसकेको निमित्त शिक्षा अधिकारी भट्टले बताउनुभयो । अनौपरिचारिक शिक्षा केन्द्रको सहयोगका शिक्षा कार्यालय कञ्चनपुरले जिल्लाका ४५ हजार निरक्षरलाई साक्षर लक्ष्य लिएको छ । जिल्लामा १९ वटा सामुदायिक अध्ययन केन्द्रमार्फत कक्षा सञ्चालन भइरहेका छन् ।
एक हजार ५०० स्वयम्सेवकलाई कक्षा सञ्चालनका लागि पाँचदिने तालिम दिइसकेको शिक्षा अधिकारी भट्टले बताउनुभयो । सबै गाविस र नपामा कक्षा सञ्चालन भइसकेको भट्टले बताउनुभयो ।
शिक्षा कार्यालयले आर्थिक वर्ष २०६७÷६८ मा जिल्लामा निरक्षरहरूको नामावली सङ्कलन गरेको थियो । जसमध्ये गत वर्ष २६ हजार निरक्षरलाई साक्षर बनाइसकेको छ । ‘‘अब बाँकी रहेका निरक्षरलाई साक्षर बनाउने अभियानमा जुटेका छौँ’’ उहाँले बताउनुभयो ।