बाह्रबिसे , माघ १४ - आसपासका सबै बालबालिका विद्यालय ल्याउन र आएकालाई टिकाइराख्न पोसाक, स्टेसनरी र झोला वितरण गरिएको छ । स्थानीय अभिभावकको सहयोगमा बागेश्वरी प्राथमिक विद्यालय धार्पाका बालबालिकालाई उक्त सामग्री निःशुल्क प्रदान गरिएको हो । उक्त सामग्री शैक्षिक जनशक्ति विकास केन्द्रका कार्यकारी निर्देशक डिल्लीराम रिमालले हस्तान्तरण गरेका हुन् । रिमालले सोही समारोहमा ०५४ मा स्थापित उक्त विद्यालय भवनको उद्घाटन गरे । उनले शिक्षामा वर्षेनी अर्बौं लगानी गरे पनि अपेक्षित उपलब्धि हासिल गर्न नसकिएको बताए । अभिभावकको चाहना छोराछोरीले अंग्रेजी पढुन् भन्ने हो, उनले भने, 'सोहीअनुरूप पाठ्यक्रम तयार गर्न खोजिएको छ ।' छोराछोरी विद्यालय नपठाउने अभिभावकमाथि कानुनी कारबाही गर्ने सोच शिक्षा मन्त्रालयले गरिरहेको छ, उनले भने ।
अभिभावकले सरकारी असहयोगका कारण विद्यालय भवन जीर्ण हुँदै गएको गुनासो गरेका थिए । स्व. नारायणबहादुर भण्डारीले जग्गा दिएपछि स्थानीय अभिभावक, दलका कार्यकर्ता र शैक्षिक क्षेत्रका अगुवाले विद्यालय स्थापना गरेका हुन् । कार्यक्रममा केन्द्रका उपनिर्देशक डा. आनन्दराम पौडेलले बालबालिकाको हितमा काम गर्न अभिभावकसँग आग्रह गरे ।