जन्मदर्ता नहुँदा ४० जना विद्यार्थी नामाङ्कनबिना पढ्न बाध्य

 गौशाला, माघ १६ गते । जन्मदर्ता नहँुदा महोत्तरी जिल्लाको परकौली फुल्हट्टा गाविसस्थित मथुरा प्राथमिक विद्यालयमा ४० जना विद्यार्थी नामाङ्कनबिना नै पढ्न बाध्य भएका छन् ।सो विद्यालयकी शिक्षिका उषा सिंहका अनुसार यसवर्ष विद्यालयमा नयाँ भर्नाका लागि आएका स्थानीय ४० जना बालबालिका जन्मदर्ताको अभावमा नामाङ्कन नगराइकनै पढिरहेका छन् ।
गाविसमा लामो समयदेखि गाविस सचिव नपुगेका कारण बालबालिकाको जन्मदर्ता बन्न नसकेको ती विद्यार्थीका अभिभावकको भनाइ छ ।
जिल्ला सदरमुकाम जलेश्वरबाट मात्र तीन किलोमिटरको दूरीमा रहेको परकौली फुल्हट्टा गाविसमा दुई वर्षभन्दा बढी समयदेखि गाविस सचिव नआएको स्थानीय रामस्नेही रायले बताउनुभयो ।
सो गाविसका सचिव मोहन भगत दुई वर्षदेखि कार्यालयमा नआई जिल्ला सदरमुकाम जलेश्वरमा बसेरै गाविसका  कामकाज गर्दै आएका र प्राविधिक सहायक रामजी कापरसमेत कहिल्यै पनि कार्यालयमा नआएको स्थानीय हरिचन्द्र मुखियाले बताउनुभयो ।
गाविस सचिव र प्राविधिक सहायक दुवैजन गाविसमा नपुग्दा स्थानीयवासीको जन्मदर्ता, विवाहदर्ता, मृत्युदर्ता, नागरिकता, जग्गा सिफारिस, नाता प्रमाणितजस्ता कामकाज समयमा नहुने गरेको स्थानीय अल्लाउद्दिन मोमिनले बताउनुभयो ।
परकौली फुल्हट्टा गाविसका आम जनतालाई कुनै सिफारिस लिनु पर्दा सचिवलाई खोज्दै जिल्ला सदरमुकाम जलेश्वर आउनुपर्ने बाध्यता रहेको छ । रासस