म्याग्दी, माघ १३ गते । जिल्ला शिक्षा कार्यालय म्याग्दीले चालु शैक्षिकसत्र २०७० मा विद्यार्थीहरूलाई साढे ७० लाख रुपैयाँभन्दा बढी छात्रवृत्ति वितरण गरेको छ ।
जिल्लाका २४० विद्यालयमा अध्ययनरत् विद्यार्थीहरूलाई छात्रवृत्ति वितरणका लागि ७० लाख ५४ हजार ३०० रुपैयाँ खर्च भएको कार्यालयले जनाएको छ । कक्षा १ देखि ८ सम्म अध्ययनरत् दलित विद्यार्थीहरूलाई २९ लाख ३६ हजार ८०० र छात्राका लागि २५ लाख ८४ हजार रुपैयाँ छात्रवृत्ति वितरण गरिएको जिल्ला शिक्षा कार्यालयका शाखा अधिकृत फक्तबहादुर श्रेष्ठले जानकारी दिनुभयो ।
यसैगरी कक्षा ९ र १० मा अध्ययनरत ६८५ जना दलित विद्यार्थीलाई प्रतिव्यक्ति ५०० रुपैयाँका दरले तीन लाख ४२ हजार ५०० र ७०१ जनालाई माध्यमिक छात्रवृत्तिबापत ११ लाख ९१ हजार रुपैयाँ वितरण गरिएको छ ।
जिल्ला शिक्षा कार्यालयका अनुसार हाल जिल्लाभरका सामुदायिक विद्यालयहरूमा २७ हजार ९३७ जना विद्यार्थी रहेकामा २८.५४ प्रतिशत दलित समुदायका रहेका छन् । छात्रको तुलनामा छात्राहरूको सङ्ख्या बढी रहेको जिल्ला शिक्षा अधिकारी विष्णुनारायण श्रेष्ठले बताउनुभयो ।