जनकपुरधाम, चैत १६ गते । रजिष्ट्रेशन फारम दाखिलामा उच्च माध्यमिक शिक्षा परिषद् जनकपुरले गरेको लापरबाहीको विरोधमा उच्च माध्यमिक विद्यालय सङ्घ, नेपाल धनुषाले आजदेखि शैक्षिक संस्थाहरु अनिश्चितकालका लागि बन्द गरेका छन ।
रजिष्ट्रेशन फारमबापतको रकम बुझी भर्पाईसमेत दिइसकेको अवस्थामा उच्च माध्यमिक शिक्षा परिषद्ले २४७ जना विद्यार्थीको दाखिला नगरेकोप्रति आक्रोशित भएका उच्च माध्यमिक विद्यालय सङ्घ नेपाल (हिसान) धनुषाले आन्दोलनलाई सशक्त पार्दै अघि बढ्ने गरेको निर्णयअनुसार आजदेखि शैक्षिक संस्था बन्द गरेको हो ।
छुटमा परेका विद्यार्थीको फारम दाखिला गरी समस्या समाधान गर्नको लागि हिसानले एक सातादेखि दबाबमूलक कार्यक्रमहरु गर्दै आएको थियो ।
परीक्षा नजिकिँदै गए पनि उच्च माध्यमिक शिक्षा परिषद्ले आवश्यक कदम नचालेको बताइएको छ ।
रकम बुझेर पनि विद्यार्थीको रजिष्ट्रेशन फारम दाखिला नगरेको आरोप हिसानको छ । यसैबीच, उच्च माध्यमिक शिक्षा परिषद् जनकपुरका निमित्त प्रमुख उत्तमराज नेपालले रजिष्ट्रेशन छुट भएका विद्यार्थीका लागि परीक्षा नियन्त्रण कार्यालय भक्तपुरलाई समेत पत्राचार गरिसकेको जनाउँदै निर्देशनको पर्खाईमा रहेको बताउनुभयो ।
गत फागुन २७ गते नै परीक्षा नियन्त्रण कार्यालयलाई पत्राचार गरिसके पनि हालसम्म कुनै निर्देशन नआएको पनि उहाँले प्रष्ट पार्नुभयो ।
तर, उच्च माध्यमिक शिक्षा परिषद्कै त्रुटिका कारण ती विद्यार्थीको रजिष्ट्रेशन फारम दाखिला हुन छुटेको बारे उहाँले केही बताउनु भएन् ।
सोही मागलाई लिएर विद्यार्थीहरु विरोधस्वरुप जनकपुर नगरपालिकामा शैक्षिक सङ्घसंस्था बन्द गरी विद्यार्थीको भविष्यको सुनिश्चितताको माग गर्दै प्रदर्शनसमेत गरिरहेका छन् । रासस