दोलखा, चैत्र १५ - शैक्षिक जीवनमा विशेष महत्व ठानिने एसएलसी परीक्ष्ाामा समेल हुन तयार भएर पनि दोलखाका तीन सय ४९ जना छुटेका छन् । छुटेकामध्य महिला विद्यार्थी बढी छन् ।
व्यक्तिगत कारण र प्रकृया पूरा नभएका कारण परीक्षाबाट विमुख हुनेको संख्या त्यति पुगेको अनुमान गरिएको छ । एसएलसी सकिएपछि जिल्ला शिक्षा कार्यालयद्धारा आयोजित पत्रकार सम्मेलनमा नियमिततर्फ सात छात्र र १६ छात्रा गरी २१ जना परीक्षामा सामेल नभएको जानकारी दिइएको छ । एक्जेम्टेडतर्फ एकसय १३ छात्र र एकसय १४ छात्रा गरी दुई सय २७ जना परीक्षामा अनुपस्थित भएको जिल्ला शिक्षा अधिकारी दीपक शर्माले बताए ।
परीक्षामा पुरुष भन्दा महिला विद्यार्थी बढी संख्यामा अनुपस्थित रहेको पाइएको छ । एसएली परीक्षा दिन आवेदन फारम भरेपछि विहे भएर अन्तै जाने समस्या छ । परीक्षाका बेला बच्चा जन्माउने कारणले पनि महिला विद्यार्थीहरु अनुपस्थित हुने देखिएको शिक्षा कार्यालयको अनुमान छ । त्यसैगरी बैदेशिक रोजगारीमा जाने र पटकपटक परीक्षा दिदाँ पनि असफल भएपछि दिक्क भएर छाड्ने कारण पाइएको शिक्षा अधिकारी शर्माले बताए ।
अनुपस्थित रहनेमध्ये एकसय २१ जना भने प्रकृया नपुगेर परीक्षामा सामेल हुन पाएनन् । शैक्षिक सत्र २०७० मा उनीहरुले कक्षा १० मा अध्ययन गर्दा हाजिर संख्या नपुगेर अयोग्य ठहरिएको विवरण सम्वन्धित विद्यालयहरुले शिक्षा कार्यालयमा पठाएका छन् । यस बर्ष दोलखाबाट एक जना विद्यार्थीले गणित विषय पछिका परीक्ष्ााहरुमा सामेल हुन पाएनन् । भीम उच्च मावि परीक्षा केन्द्रबाट परीक्षा दिने विद्यार्थीले आफ्नो कापी घर लिएर गएका हुनाले त्यसपछिको परीक्षाबाट बञ्चित गरिएको जानकारी पनि शिक्षाले दिएको छ ।
यसबर्षको परीक्षा तुलानात्मक रुपमा मर्यादित र शान्तिपूर्ण भएको जिल्ला परीक्षा समन्वय समितिको ठहर छ । प्रमुख जिल्ला अधिकारी प्रल्हाद पोखरेलले परीक्षा केन्द्रको वाहिरी बातावरण र भित्री वातावरण मर्यादित भएको बताए । यसबर्ष दोलखाबाट नियमिततर्फ तीन हजार चारसय ३९ र एकजेम्टेडतर्फ एकहजार छ सय दुई गरी कुल पाँच हजार ४१ जना परीक्षामा सामेल भएको केन्द्रहरुबाट प्राप्त भएको शिक्षाद्धारा जारी वक्तव्यमा उल्लेख छ ।
(कान्तिपुर दैनिकबाट)