मङ्गलबारे (इलाम), चैत १६ गते । अनुमति प्राप्त संस्थागत विद्यालयले प्रत्येक वर्ष जिल्ला शिक्षा कार्यालयमा पेस गर्नुपर्ने शुल्क प्रस्ताव अझै पेस गरेका छैनन् ।
आगामी शैक्षिकसत्रका लागि माघ मसान्तसम्ममा पेस गरिसक्नुपर्ने शुल्क प्रस्ताव पेस नगरेकाले २२ वटा विद्यालयलाई जिल्ला शिक्षा कार्यालय इलामले जरिवाना गर्ने भएको छ । जिल्लामा सञ्चालित ११८ वटा अनुमति प्राप्त संस्थागत विद्यालयमध्ये ९६ वटाले समयमै प्रस्ताव पेस गरेको र नगर्नेलाई जिसिकाले जरिवाना गर्न लागेको जिसिकाका कर्मचारी वीरेन्द्र कुसियैतले जानकारी दिनुभयो ।
विद्यालयले लिने भर्ना शुल्क, स्टेसनरी, परीक्षा शुल्क आदिका बारेमा पहिले नै शुल्क निर्धारण गरी कार्यालयमा बुझाउनुपर्छ । मासिक शुल्क बराबर भर्ना शुल्क लिनुपर्ने हुन्छ, कुसियैतले भन्नुभयो, “कतिपय विद्यालयले भर्ना शुल्कभन्दा मासिक शुल्क बढी लिने गरेको पाइएको छ ।”
समयमै शुल्क प्रस्ताव पेस नगर्ने विद्यालयलाई शुल्क अनुगमन समितिको बैठकले रु एक हजारदेखि रु २५ हजारसम्म जरिवाना गर्ने उहाँले बताउनुभयो ।
गत वर्ष पनि समयमै शुल्क प्रस्ताव पेस नगर्ने ५५ वटा विद्यालयलाई जरिवाना गरिएको जिल्ला शिक्षा कार्यालयले जनाएको छ ।