भक्तपुर, बैशाख १६ ।
शिक्षक सेवा आयोग पुनः सात हजार स्थायी शिक्षक दरबन्दीका लागि विज्ञापन गर्ने तयारीमा जुटेको छ । आयोगले गत वर्ष १३ हजार ५९ दरबन्दीका लागि विज्ञापन माग गरेको थियो ।
आयोगका प्रशासकीय प्रमुख (सहसचिव) खगेन्द्र नेपालले आगामी साउनमा विज्ञापन गर्ने तयारी भइरहेको बताउँदै भन्नुभयो, “त्यसका लागि जिल्लाहरुबाट रिक्त दरबन्दीको सङ्ख्या माग गरेका छौँ ।”
आयोगले यस पटक २०७० साउन १ गतेदेखि आगामी २०७२ असार मसान्तसम्म रिक्त हुने दरबन्दीमा नयाँ विज्ञापन गर्न लागेको छ । आयोगले यस वर्ष २०७० साउनदेखि २०७१ असार मसान्तसम्मको दरबन्दीमा नयाँ विज्ञापन माग गर्ने सोचाइ बनाए पनि गत वर्ष लिइएको परीक्षाको नतिजा प्रकाशनमा ढिलाइ भएकाले यस वर्ष एकै पटक दुई वर्षकै विज्ञापन खुलाउन लागेको हो ।
प्रशासकीय प्रमुख नेपालले जिल्लाहरुबाट तथ्याङ्क संकलन गर्ने कार्य भइरहेको जानकारी दिँदै अहिलेसम्ममा करिव सात हजार पद रिक्त हुने अनुमान गरिएको बताउनुभयो ।
गत २०६९ सालमा १७ वर्षपछि आयोगले शिक्षक पदका लागि खुला विज्ञापन माग गरेको थियो । गत जेठमा लिइएको लिखित परीक्षाको नतिजा गत मंसिर महिनामा प्रकाशित गर्न सुरु गरिएकोमा अख्तियार दुरुपयोग अनुसन्धान आयोगले रोक्का गरेको थियो र अनुसन्धानपछि पुनः निरन्तरता दिइएको थियो । सोमबार आयोगले माध्यमिक तहको अन्तर्वार्ता सम्पन्न गरिसकेको छ ।
आयोगले निम्न माध्यमिक तहमा यही १९ गते र प्राथमिक तहमा आगामी जेठ ३ गते अन्तर्वार्ता सञ्चालन गर्दैछ । आयोगले अन्तर्वार्ताबाट प्राथमिक तहका लागि सात हजार ९८० जना, निम्न माध्यमिक तहका लागि दुई हजार ७९३ जना र माध्यमिक तहका लागि दुई हजार २८६ जना छनोट गर्नेछ ।
आयोगका प्रशासकीय प्रमुख नेपालले भन्नुभयो, “वैशाखको नयाँ शैक्षिक सत्र सुरु हुँदा नै विद्यार्थीहरुले नयाँ शिक्षक प्राप्त गर्ने थिए, तर संविधानसभा निर्वाचन र अख्तियारको छानविनका कारण त्यो पूरा हुन सकेन । अब आगामी असारमा विद्यालय र विद्यार्थीहरुले नयाँ शिक्षक प्राप्त गर्नेछन् ।”