१८ वैशाख, सुन्दरीजल । काठमाडौँको उत्तर-पूर्वी भेगस्थित नयाँपाटी गाविसमा संस्थागत विद्यालयको छात्रावासका नाममा अवैध रुपमा बालगृह चलाइरहेको रहस्य खुलेको छ । जोरपाटी-३ स्थित नयाँबस्तीमा रहेको पेगासस अङ्ग्रेजी विद्यालयले नयाँपाटी-८ स्थित शिवपुरी नागार्जुन राष्ट्रिय निकुञ्जको सीमामा गुपचुपरुपमा पेगासस चिल्डे्रन वेलफेयर नामक बालगृह जिल्ला प्रशासन कार्यालयमा दर्ता गरेर सार्वजनिक रुपमा भने पेगासस छात्रावास देखाएको हो ।
विसं २०६७ असोज ४ गते जिल्ला प्रशासन कार्यालय काठमाडौँमा दर्ता भएको वेलफेयरको कार्य समितिमा विद्यालयका लगानीकर्ता अध्यक्ष र अन्य दुई शिक्षक सदस्य रहेका छन् । पेगासस विद्यालयका लगानीकर्ता र प्रधानाध्यापकसमेत रहेका वेलफेयर अध्यक्ष किन्ले डेण्डुप तामाङ लामाको नाममा रहेको आठ रोपनी जग्गामा बनेको भवनमा ८० जना बालबालिका आवासीय सुविधासहित बसिरहेका छन् ।
सबै विद्यार्थी पेगासस विद्यालयमै अध्ययन गर्ने गरेको लामाले बताए । “विदेशीहरुको दर्तावाला च्यारिटीमार्फत सहयोग पनि लिने गरेका छौँ, तर लामो प्रक्रिया अपनाउनुपर्ने भएकाले विदेशी सहयोग लिँदा सरकारको अनुमति लिएका छ्रैनौँ”-लामाले भने । पेगासस विद्यालयको सल्लाहकारसमेत रहनुभएका अधिवक्ता नारायणकुमार खड्का वेलफेयरका सचिव बताउँछन् । अवैध रुपमा बालगृह चलाएका सम्बन्धमा जिज्ञासा राख्दा खड्का भने, “वेलफेयरको बालगृह खोल्ने उद्देश्य दर्ताका समयमा जिल्ला प्रशासनले काटिदियो त्यसैले यसरी चलाउन बाध्य भएका हौँ । ‘ काठमाडौँका जिल्ला शिक्षा अधिकारी वैकुण्ठ अर्याल छात्रावास हेर्ने सम्बन्धमा कुनै नियम कानुन नभए पनि छात्रावास भन्दै बालगृह चलाउन नपाइने बताए ।
केन्द्रीय बाल कल्याण समितिका सूचना अधिकृत झलहरि भट्टराई बालबालिका आवासीय रुपमा बस्ने बालगृह भएकाले समितिमा अनिवार्य रुपमा बस्ने बताए । यसरी दर्ता भएका बालगृह प्रत्येक वर्ष नवीकरण भएको हुनुपर्छ । दर्ता र नवीकरण नगरी चलाइएका आवासीय बालगृह अवैध हुन् भट्टराईले भने । काठमाडौँ उपत्यकामा ४०० बालगृह दर्ता भए पनि सोभन्दा बढी सङ्ख्यामा अवैध बालगृह दर्ता नभई चलिरहेको दीलशोभा प्रकरणले नै पुष्टि गरेको पनि भट्टराईले बताउनुभयो । रासस