काठमाडौं, २०७१ वैशाख १८ गते । त्रिभुवन विश्वविद्यालयले यसै वर्षदेखि लागू गरेको खुला तथा दूर सिकाई प्रणाली शिक्षामा विद्यार्थी अभाव भएको छ । त्रिविले पहिलो चरणमा यस वर्षदेखि शिक्षाशास्त्र संकाय पढाइ हुने ६ वटा क्याम्पसमा खुला शिक्षाको पढाइ सुरु गरेको छ ।
खुला शिक्षाका लागि गोरखाको गोरखा क्याम्पस, सिरहाको सूर्यनारायण सत्यनारायण मरवैता यादव बहुमुखी क्याम्पस र सुर्खेत क्याम्पस छानिएका छन् । अहिलेसम्म ती सबै क्याम्पसमा गरेर एक सय १६ जना मात्र विद्यार्थी भर्ना भएका छन् । जसमध्ये सबैभन्दा धेरै अर्थात ४० जना विद्यार्थी भक्तपुरको सानोठिमी क्याम्पसमा भर्ना भएका छन् । गोरखा क्याम्पसमा चार जना मात्र भर्ना भएका छन् ।
त्रिवि खुला तथा दूर सिकाइ कार्यक्रमका संयोजक श्यामकृष्ण महर्जनले भने, ‘नयाँ कार्यक्रम सञ्चालनका लागि विभिन्न माध्यमबाट प्रचारप्रसार गरिएको थियो । सरोकारवालहरुलाई पनि जानकारी गराइएको थियो । तर किन हो खोइ सोचेजति विद्यार्थी आएनन् ।’
स्नातकोत्तर तहमा सेमेस्टर प्रणालीको पढाइ सुरु गरेपछि नियमित रुपमा क्याम्पस आउन नसक्ने विद्यार्थीलाई लक्षित गरी त्रिविले यो प्रणालीको पढाइ सुरु गरेको हो ।
खुला शिक्षामा विद्यार्थीले चासो नदेखाएपछि आउने वर्षमा यो प्रणालीलाई निरन्तरता दिन सकिन्छ कि सकिँदैन भन्ने चिन्ता त्रिविलाई परेको छ ।