गोपाल दाहाल
१८ बैशाख, धरान । नराम्रा अक्षर लेखेको भन्दै धरानको कार्मेल बोर्डिङका एक शिक्षकले विद्यार्थीलाई कुटपिट गरेका छन् । शिक्षक टासी शेर्पाले कुट्दा कक्षा ३ का विद्यार्थी ९ वर्षीय बालक साङ्गे शेर्पाको शरीरमा नीलडाम बसेको छ । नुहाउने क्रममा शरीरमा नीलडाम र चोट देखिएपछि बालकले उनका काका मिङ्मा चुक्टे शेर्पालाई आफूलाई शिक्षकले कुटेको बालकले बताएका थिए ।
शारीरिक रुपमा कमजोर भतिजलाई चोट लाग्नेगरी कुटेको देखेपछि आक्रोशित मिङ्माले भने ‘भतिजलाई कुटेकोबारे गुनासो गर्दा उल्टै मलाई जातीय कुरा जोडेर सम्झाउन खोजियो, विद्यालयमा यातना बन्द गरिनु पर्छ ।’
विद्यालयका निर्देशक बीरबल शेर्पा भने शिक्षक टासीलाई विद्यार्थी कुट्न नहुनेबारे ज्ञान नभएकाले घटना भएको बताए । विद्यार्थीलाई सामान्य चोट लागेको बताउँदै उनले विद्यालयले उपचार गरिदिने बताए । शिक्षक टासीलाई सम्झाएर माफी मगाएको निर्देशक शेर्पाको भनाइ छ ।
विद्यालयमा बालमैत्री वातावरण नीति ल्याइएपनि धरानका अधिकांश निजी बोर्डिङमा यस्तो वातावरण पाईंदैन । शिक्षकले विद्यार्थी कुट्ने गरेका घटना पटक पटक सार्वजनिक हुँदा पनि सरोकारवालाले रोक्नेतर्फ चासो देखाएको पाईंदैन । नानीहरुलाई फकाएर पढाउने, छडीरहित कक्षा बनाउने अभियान चलाए पनि निजी विद्यालयका विद्यार्थी र शिक्षक पि्रन्सिपलबाट आतंकित छन् ।
केही वर्षअघि धरानकै नाम चलेको बोर्डिङ विष्णु मेमोरियली छात्राको झोलामा शिक्षकले अश्लील चलचित्रको सिडी भेटेपछि प्रिन्सिपलको डरले झुण्डिएर आत्महत्या गरेकी थिईन् । सो घटनापछि बनेको छानविन समितिले विद्यालयले बालमैत्री वातावरण निर्माण गर्नुपर्ने सुझाव दिएको थियो । तर अहिलेपनि अधिकांश विद्यालयमा पि्रन्सिपलदेखि विद्यार्थी तर्सिने गरेका छन् ।
सरकारी विद्यालय बालमैत्री बने पनि निजी स्कुलले शिक्षा नियमावली पालना गरेको पाईंदैन । नियमावलीले तोकेबमोजिम शैक्षिक वातावरण, शिक्षकको योग्यता, कक्षाकोठाको वातावरण र शौचालय पनि व्यवस्थित नबनाइँदा विद्यार्थी सास्ती भोग्न बाध्य छन् । जिल्ला शिक्षा कार्यालय र विद्यालय निरीक्षकले निजी विद्यालयको अनुगमन नगर्दा यो समस्या आएको अभिभावको भनाइ छ ।
Source: http://www.onlinekhabar.com