सन्तोष गौतम, म्याग्दी २०७१ जेठ १४ । म्याग्दीको दरवाङमा रहेको जनप्रिय उच्च माविको भवन बनेको तीन वर्षसम्म पनि प्रयोगमा आउन सकेको छैन ।
भवन बनेपनि उपयोगका लागि अपायक भएपछि राज्य र समुदायको लाखौ लगानीमा निर्मित भवन प्रयोगबिहीन बनेको हो । बि.स २०६८ सालमा जिल्ला शिक्षा कार्यालय मार्फत सरकारको २४ लाख रुपैया अनुदान र स्थानीयको श्रमदान गरि २९ लाख रुपैयाको लागतमा दरवाङ स्थित छ्यारछ्यारे बगरमा चार कोठे पक्कि कक्षा कोठा भवन निर्माण भएको थियो ।
विद्यालयलाई भवनको योजना परेपनि हाल रहेको भवन परिसरमा जग्गाको अभाव र पुरानो भवन रहेको स्थानमा भवन बनाउन समुदायबाट बिरोध भएपछि छ्यारछ्यारे बगरमा भवन निर्माण गरिएको थियो । बाध्यताले अपायक पर्ने ठाउँमा भवन निर्माण गर्नुपर्दा प्रयोग गर्न नसकिएको प्राचार्य दिवाकर सुवेदीले बताए । उक्त विद्यालयको तिन ठाउँमा भवन छन तर एक ठाउँको भवन मात्र उपयोग भएको छ ।
तत्कालै भवन प्रयोगमा आउन नसकेपनि दुरुपयोग हुन नदिएको र पछि स्नातक तहको कक्षा सञ्चालनका लागि भवनको उपयोग गरिने प्राचार्य सुबेदीको भनाई रहेको छ । नया भवनदेखि हाल उच्च मावि तहको कक्षा सञ्चालन हुने भवनमा पुग्न १० मिनेट पैदल हिँड्नु पर्छ । विद्यालयका अनुसार हाल प्रयोग भइरहेको भवन पर्याप्त नभएपनि टाढा भएका कारणले नयाँ भवनको प्रयोग गर्न समस्या भएको छ ।
जिल्ला शिक्षा कार्यालयले भने भवन लगायतका पुर्वाधारलाई उद्देश्य अनुसार उपयोग गर्नुपर्ने जनाएको छ । कतिपय विद्यालयहरुले भवन लगायतका पुर्वाधारका लागि बजेट नपाएर पठनपाठन प्रभावित बनेको अवस्थामा बजेट पाएर बनाइएका भवनको उपयोग नभएर अलपत्र पर्नु र शिक्षा कार्यालयले चासो नदिनु गम्भिर लापरबाही भएको सरोकारवालाहरुको भनाई रहेको छ ।