होमराज रानाभाट नवलपरासी जेठ १३ गते । जिल्ला शिक्षा कार्यालयको गम्भीर लापरबाहीका कारण नवलपरासीमा अझै दुई दर्जन बिद्यालयमा खेताला शिक्षकहरुले अध्ययन अध्यापन गराईरहँदा पनि कारबाही गर्ने तिर ध्यान गएको पाईदैंन ।
सामुदायिक बिद्यालयमा कार्यरत शिक्षकहरु मध्ये झण्डै दुई दर्जन शिक्षकहरुले खेतालामा शिक्षक राखेर राज्यलाई सिधै ठगिरहँदा पनि शिक्षा कार्यालय भने थाहा पाए पनि नपाए जस्तो गरेर बसेको एक शिक्षकले आफनो नाम नछाप्ने शर्तमा भने नवलपरासीमा खेताला शिक्षकलाई पाँच हजार देखि आठ हजार सम्म तलब दिएर ठगी गर्नेको संख्या दुई दर्जन भन्दा बढि छ ।
जिल्लाको पहाडी गाबिसका बिद्यालय र तराईका बिद्यालयमा खुले आम खेताला शिक्षकको बिगबिगी बढेको र यो नियन्त्रण गर्ने नाममा जिल्ला शिक्षा कार्यालयको गम्भीर लापरबाही र मौनताले शिक्षामा खेलवाड भैरहेको ती शिक्षकले बताए ।
जिल्ला शिक्षा अधिकारी टेकबहादुर थापा भने जिल्लामा खेताला शिक्षक भएको आफुलाई थाहा नभएको र त्यस्तो थाहा पाएमा कडा कारबाही गर्ने बताउनुभयो । उहाँले खेताला शिक्षक राखेर सरकारलाई ढाँटेको पाईएमा एक छिन पनि जागीरमा टिक्न नदिने बताए पनि ठुला राजनीतिक संरक्षणमा रहेका त्यस्ता खेताला राख्ने शिक्षकलाई जिल्ला शिक्षा अधिकारीले कारबाही गर्न नसक्ने अधिकांश जिल्लाका शिक्षकहरु बताउँछन् ।
जिल्ला शिक्षाले सुस्म छानबीन गर्न नसक्दा बिद्यालयमा जाने दिवा खाजामा ठुलो घोटाला भएको पाईएको छ भने बिद्यालय बन्द हुदाँ समेतको रकम दिवा खाजाका नाममा निकाशा भएको पाईएको छ । नवलपरासीमा १४ हजार बालबालिकालाई दिवा खाजा बापतको प्रति दिन रु १२ का दरले रकम राज्यले दिने गरेको भए पनि धेरै बिद्यालयले सो रकम बराबरको खाजा उपलब्ध नगराउने ,अधिकाशं दिनमा कम मुल्यको खाजा खुवाउने ,महिनामा मुश्किलले १५ दिन पनि खाजा नदिने जस्ता कार्य भै रहँदा पनि शिक्षा कार्यालयले छानबीन गरि कारबाही गर्न नसकेको स्थानीय बासीले बताए । दिवा खाजामा मात्र नवलपरासीमा झण्डै चार करोड भन्दा बढि रकम आउने गरेको शिक्षा कार्यालयको भनाई छ । यसमा करोडौं अनियमितता भएको आशांका गरिएको छ ।
दिवा खाजा प्राप्त गरेका कतिपय बिद्यालयले फर्जी बिल बनाएर पेश गर्ने गरे पनि कसैले कारबाही नगर्दा यस्ता कार्यले बढावा पाएको गुनासो बढेको छ । शिक्षा अधिकारी थापाले कडा छानबीन थालीएको बताउँदै,दोषी माथि कारबाही भएरै छाडने बताउनुभयो ।