काठमाडौ, श्रावण १२ - भक्तपुरको साँगास्थित नेपाल प्रहरी उच्च माध्यमिक आवासीय विद्यालयले कर्मचारी आमाको कारण छोरी निष्काशन गरेको छ । कक्षा १२ मा अध्ययनरत स्वेच्छा लुइँटेललाई विद्यालयले निष्काशन गरेको हो । उनी कक्षा ११ को परीक्षा दिएर नियमित पढ्दै आएकी थिइन् । छात्रा स्वेच्छाले प्रिन्सिपल नवरत्न बानियाँ र समादेशक राजुबाबु श्रेष्ठले 'आमाकै कारण पढ्न नआउन' भनेपछि न्याय खोज्दै हिंड्नु परेको बताइन ।
' आमाकै कारण मलाई कारबाही गरिन्छ भन्ने लागेकै थिएन,' उनले भनिन्, 'मैले कक्षामा कहिल्यै बदमासी र कोहीप्रति नराम्रो व्यवहार गरेकी छैन । एकाएक पढाइ छाड्नुपर्ने बाध्यताले विचलित भएकी छु ।'
स्वेच्छाकी आमा धेनुका उक्त विद्यालयमा दस वर्षदेखि पुस्तकालय सहायकमा कार्यरत छिन । स्थायी कर्मचारी रहेकी उनलाई गत फागुनमा भने पियनसरह काममा खटाएपछि उनी र विद्यालय प्रशासनबीच खटपट भएको थियो । बढूवाको सट्टा घटूवा गरिएप्रति न्याय पाउन उनले अदालतमा मुद्दा दायर गरेकी थिइन् । पुनरावेदन अदालत पाटनले 'नियुक्तिपत्र बमोजिम साबिककै काम खटाउन' आदेश दिएपनि कार्यान्वयन हुन सकेको छैन ।
प्रिन्सिपल बानियाँले छात्रालाई निष्काशन गरेको नभई अभिभावकले आफ्नो मुद्दा बलियो बनाउन सुनियोजित हल्ला फिजाएको बताए । 'हामीले छात्रालाई निष्काशन गरेका छैनौं,' प्रहरी स्कुल चेन अफ कमाण्डमा चल्ने उल्लेख गर्दै उनले ईकान्तिपुरसित भने, 'छात्राकै आमाबाबुले विद्यालयविरुद्ध एकपछि अर्को मुद्दा हालेका छन् । मुद्दा बलियो बनाउन छोरीलाई हतियार बनाएका मात्र हुन् । हामी पढ्न नआउन दवाब दिएका छैनौं ।'