१२ साउन, नेपालगन्ज : एसएलसी परीक्षामा निष्काशन गरिएका विद्यार्थी प्रथम श्रेणीमा पास भएका छन। २०७० साल चैत १२ गते स्वास्थ्य जनसंख्या तथा वातावरणको परीक्षामा पटक पटक चेतावनी दिदा पनि नमानेपछि जिल्ला शिक्षा कार्यालयबाट खटिएको अनुगमन टोलीले युद्धसस्कृत विद्यालयमा परीक्षामा सहभागी ०६७५५९२ एच सिम्बोल नम्बर भएका विद्यार्थीलाई निष्काशन गरि सो दिनको परीक्षा रद्द गरिएको थियो।
परीक्षाफल प्रकाशित हुदा त्यो सिम्बल नम्बर प्रथम श्रेणीको लिस्टमा छ। साहयक जिल्ला शिक्षा अधिकारी रामचन्द्र पौडेल र तत्कालिन लेखाअधिकृत गणेश ज्ञवालीको टोलीले ती विद्यार्थीलाई निष्काशन गरेको थियो। निष्काशन गरेका विद्यार्थीको उत्तरपुस्तीका कसरी पठाइयो भन्ने बिषय भने रहस्यमय बनेको छ।
ती विद्यार्थी नेपालगन्जको चर्चित विद्यालय जयबागेश्वरी उच्च माध्यमिक विद्यालयका विद्यार्थी भएको थाहा भएको छ। सो विद्यालयले शतप्रतिशत पास गरेको भन्दै सञ्चारमाध्यमबाट प्रचारप्रसार गरिरहेको छ। परीक्षा अवधिमा अनुगमन गर्दा चिट चोरी रहेको अवस्था फेला गरेका ती विद्यार्थी पटक पटक चेतावनी दिदा नक्कल गर्न नछाडेपछि निष्कासन गरी परीक्षा नै रद्द गरिएको थियो। ती विद्यार्थीबाट ५/६ वटा चिट समेत टोलीले बरामद् गरेका थियो।
परीक्षा रद्द गरिएको उत्तरपुस्तीका केन्द्राध्यक्ष दिलिप श्रीवास्तवले नै राखेका थिए। सम्बन्धीत विद्यालयबाट आर्थिक लाभ लिएर केन्द्राध्यक्षले सो उत्तरपुस्तिका परिवर्तन गरेर पठाएको हुनसक्ने जिल्ला शिक्षा कार्यालय स्रोतले जनाएको छ।