जाजरकोट, आश्विन १४ - जगत निमावि मैनाका प्रधानाध्यापक दुर्गालाल मण्डल तलब थाप्न सदरमुकाम बसेका छन्। फूलपाती आउनै आँट्दा पनि तलब थाप्न नपाउँदा सप्तरी ४, कटैया निवासी मण्डलको दसैं बाटामै बित्ने भएको छ।
त्यस्तै थर्पू माध्यमिक विद्यालय ढिमेका प्रधानाध्यापक सुवानन्द चौधरीले पनि तलब थाप्न पाएका छैनन्। उनीहरूजस्तै यहाँका सयौं शिक्षक तलब थाप्न सदरमुकाम अडकएको साता बितेको छ। दसैं पर्व मनाउन त कता हो उनीहरूलाई तलब थाप्न नै मुस्किल भएको हो।
जिल्ला शिक्षाले तलब ढिलो निकासा छोड्दा र सरकारी कारोबार गर्ने एउटा मात्र नेपाल बैंक लिमिटेड शाखामा हुने भिडभाडले शिक्षकलाई तलब थाप्न सास्ती भएको हो। आइतबारदेखि शिक्षकको बैंकमा चेक साट्न भिड लाग्न थालेको छ। दसैं पर्व सुरु भएको पाँच दिन बित्यो। तर यहाँका आधा शिक्षकले तलब पाउन सकेका छैनन्। उनीहरूको बैंकमा दैनिक भिड लाग्ने गर्छ। उनीहरूले खातामा तलब जम्मा गर्न, सञ्चयकोष जम्मा गर्न र मनी ट्रान्सफर गर्नसमेत पालो पाउन सकेका नसकेको बताए। 'तलब लिन सदरमुकाम कुरेका छौं, घर कहिले पुग्ने हो थाहा छैन। दसैं बाटामै बित्ला भन्ने चिन्ता भो। घर परिवारका सदस्य आत्तिएका छन्,' प्रधानाध्यापक मण्डलले भने।
निजामती कर्मचारी तलब बुझेर घर पुगिसके। शिक्षक भने बाटो लाग्न पाएका छैनन्। तलब खान ढिलो हँुदा जिल्लाबाहिरका शिक्षकलाई झनै समस्या भएको हो। जिल्लाका निजामती कर्मचारीले साताअघि नै तलब खाएका हुन्। 'शिक्षकलाई तलबसमेत समयमा नखुवाउने सरकारको यो सौतेनी व्यवहार कहिलेसम्म रहने हो,' शिक्षक युनियन अध्यक्ष इलमबहादुर शाहीले भने। दसैंका शिक्षक घर जान नपाएर तलब थाप्न सदरमुकाममा भौतारिन बाध्य छन्। त्यस्तै सरकारले निजामती कर्मचारीलाई बढेको तलब भत्ता खुवायो। तर शिक्षकलाई खुवाएन। यो व्यवहारले दुःखी तुल्याएको उनले बताए। शिक्षा कार्यालयले तीन दिन अघिदेखि मात्र शिक्षक तलबको निकासा छोड्दा बैंकमा पालो आउन नसकेको हो। जिल्लाका १ हजार ४ सय शिक्षकको तलब एकैसाथ निकासा गर्दा बैंकलाई पोस्टिङ गरेर भुक्तानी दिन समस्या भएको बैंकका राजीव कार्कीले बताए।
स्रोत ः कान्तिपुर