पर्वत, १४ असोज
पर्वत साहित्य सङ्गमको आयोजनामा विजयादशमी २०७१ को अवसर पारेर दुईवटा कृति विमोचन सहित शुभकामना आदानप्रदान कार्यक्रम सम्पन्न गरिएको छ ।
स्रष्टा ईश्वर सत्यको कविता संग्रह ‘उदय’ र नवप्रतिभा विष्णु शर्माको गजल संग्रह ‘नयन’ को सोही अवसरमा विमोचन गरिएको थियो । कृतिको संयुक्तरुपमा विमोचन गर्दै प्रमुख अतिथि सहप्राध्यापक लक्ष्मीप्रसाद शर्मा र विशिष्ठ अतिथि साहित्यकार शान्तिनारायण श्रेष्ठले युवा सर्जकहरुको साहित्य क्षेत्रको आगमनले पर्वत जिल्लाको साहित्यलाई माथि उठाउन सहयोग पुग्ने विश्वास व्यक्त गरे । विमोचित कृतिमाथि युवा समीक्षक जगन्नाथ पौडेल ‘नूतन’ ले टिप्पणी गरेका थिए । कृति सिर्जना गर्दा भएका अनुभूतीहरुका बारेमा स्रष्टा ईश्वर सत्य र बिष्णु शर्माले बोलेका थिए ।
कार्यक्रममा विभिन्न बक्ताहरुले आ–आफ्ना साहित्यिक सिर्जना प्रस्तुत गर्नुका साथै विजयादशमीको उपलक्ष्यमा परस्परमा शुभकामना आदानप्रदान गरेका थिए । यसरी रचना सुनाउने तथा शुभकामना आदानप्रदान गर्नेहरुमा बाबुराम सुवेदी, डीआर शर्मा, लेखनाथ उपाध्याय, सरस्वती भण्डारी ‘बिन्दु’, सरस्वती शर्मा ‘जिज्ञाशु’, खेमराज शर्मा, ठाकुर रसाइली, शंकर गिरी, सुजन शर्मा लगायतका थिए । स्रष्टा परशुराम सुवेदी र गान्धी शर्माले सुमधुर भाकामा गीत सुनाएका थिए भने शोभा शर्मा, महेन्द्र केसी, जनक तिवारी, देव शर्मा लगायतका साहित्यकार तथा पत्रकारहरुले आफ्ना रचनासहित शुभकामना आदानप्रदान गरेका थिए ।
पर्वत साहित्य सङ्गमका अध्यक्ष इन्द्रमान खत्रीको अध्यक्षता तथा संरक्षक इन्द्रकुमार विकल्पको स्वागत मन्तव्यसहित सम्पन्न भएको कार्यक्रमको सञ्चालन सङ्गमका सचिव राजेन्द्र पहाडीले गरेका थिए ।