रौतहट, असोज १२ – हिन्दुहरुको महान पर्व दशैंको मुखमा रौतहटका हजारभन्दा बढी शिक्षकले तलव पाएका छैनन् । पटक–पटक जिल्ला शिक्षा अधिकारी र स्थानीय विकास अधिकारीको सरुआले विद्यालयहरुमा दशैंको बिदा भइसक्दा पनि करिब एक हजार पाँचसय शिक्षकले तलब पाउन सकेका छैनन् । मावि र निमावि स्तरका शिक्षकहरुले सोमबारसम्म तलब पाउने अवस्था देखिए पनी प्रावि तहका झन्डै डेढ हजार शिक्षकले तलव पाउने सम्भावना न्युन रहेको शिक्षक फोरमका जिल्ला अध्यक्ष कामेश्वर यादवले बताएका छन् ।
निमित जिल्ला शिक्षा अधिकारी नन्दकिशोर गुप्ताले अख्तियारी पाएर मावि निमावि शिक्षकको तलवको आजदेखी भुक्तानी प्रकृयाहरु गरे पनि स्थानिय विकास अधिकारी नभएको कारण प्रावि शिक्षक अन्यौलमा परेको शिक्षक संघ रौतहटका अध्यक्ष राममंगल यादवले बताए । हालसम्म पनि तलवको अन्यौलताले शिक्षकहरु समस्यामा परेका छन् । निमित अधिकारी गुप्ताले शिक्षकरुको तलव दिलाउने प्रयास भइरहेको बताएका छन् ।