काठमाडौं, कार्तिक १३ - स्वास्थ्य मन्त्रालयले सिफारिस ढिलाइ गर्दा एमबिबिएस अध्ययनका निम्ति छात्रवृत्ति पाएका विद्यार्थी अन्योलमा परेका छन् । एमबिबिएस, बिडिएस र बिएस्सी नर्सिङ विषय पढ्ने तयारीमा रहेका करिब दुईसय विद्यार्थी अन्योलमा परेका हुन् ।
यी विद्यार्थीले शिक्षा मन्त्रालयले २०७० पुसमा प्रवेश परीक्षा उत्तीर्ण गरेका छन् । उनीहरुले साधारण र आरक्षित कोटामा अध्ययनको अवसर पाएका छन् । मन्त्रालयले अध्ययन गर्ने कलेज सिफारिस नगर्दा करिब दुई महिना पढाइ छुटिसकेको छ । विद्यार्थीले आफ्नो समस्यालाई लिएर नेपाल मेडिकल काउन्सिलल, शिक्षा र स्वास्थ्य मन्त्रालय धाइरहेका छन् ।
'तर हाम्रो समस्याबारे सुनवाई हुनसकेन,' पीडित विद्यार्थी प्रतिनिधिले भने, 'यो निकायबाट त्यो निकायलाई दोष दिने काममात्र भइरहेको छ । पढ्ने अवसर गुमेकाले हामी अन्योलमा छौं ।'काठमाडौं विश्वविद्यालयअन्तर्गतका कलेजहरुले एमबिबिए, बिडिएस र नर्सिङ विषयका यो वर्षको सेसनको पठनपाठन सुरु गरिसकेका छन् ।
गत वर्षको विद्यार्थीलाई कलेज सिफारिस नगर्दै शिक्षा मन्त्रालयले यही २०७१ मंसिर पहिलो साता नयाँ सत्रका लागि एमबिबिएस प्रवेश परीक्षा लिने तयारी गरेको छ । त्यसबारेमा मन्त्रालयका अधिकारीले प्रतिक्रिया दिन चाहेनन् ।