महोत्तरी ११ मंसिर / जिल्लाका अधिकाँश विद्यालयहरुमा बेथिती फेला परेको छ । अधिकाँश सामुदायिक विद्यालयहरुमा शिक्षकको हेलचेक्रयाई फेला परेको छ भने निजी विद्यालयहरु विना दर्ता सञ्चालन भएको पाईएको छ ।
जिल्ला शिक्षा कार्यालयले गएको हप्ता देखि शुरु गरेको विद्यालय अनुगमनका क्रममा सामुदायिक विद्यालयहरु समयमा नखुल्ने तथा कार्यकर्ता भर्ति केन्द्र जस्ता रहेको फेला परेको छ । कतिपय सामुदायिक विद्यालयहरुका विद्यार्थी संख्या बरावरनै शिक्षक संख्या रहेको समेत फेला परेको जिशिअ अरविन्दलाल कर्णले एडुखबरलाई बताए ।
जिल्लामा रहेका ४ सय १३ वटा विद्यालय मध्ये अहिले सम्म ७२ वटाको अनुगमन सकिएको छ । शिक्षण सिकाई भन्दा पनि भौतिक कुराहरुमा ध्यान दिएर अनुगमन गरेको उनले बताए । ‘समयमा विद्यालय खुल्छ खुल्दैन, शिक्षकको आनी वानी के छ ?, विद्यालयमा निकास भएको बजेटको परिचालन कस्तो छ ?, सुविधाहरु के कस्तो छ भन्ने थाह पाउन अनुभगन गरिएको हो, धेरै तिर समस्या देखिएको छ ।’ उनले भने ‘सुधारका लागि सबै भन्दा पहिले विद्यालय र शिक्षक स्वयंलाई जिम्मेवार बनाउँछौं, शिक्षकको भीड जिशिकामा भन्दा विद्यालयमा केन्द्रित गर्ने गरी उनीहरुको काम फटाफट गर्छौ, समयमा विद्यालय खुल्ने र शिक्षक विद्यालयमा हुने वित्तिकै सुध्रिन्छ भन्ने आशा छ ।’
अनुगमनका क्रममा २३ वटा निजी विद्यालय विना दर्ता सञ्चालनमा रहेको फेला परेको छ । उनीहरुलाई २४ घण्टा भित्र जिशिकामा उपस्थित हुन भनिए पनि कुनै पनि उपस्थित भएनन् । जिल्लामा जम्मा ४३ वटा निजी विद्यालयले जिशिकाबाट अनुमति लिएको फेला परेको छ । जिल्लामा २ सय हाराहारी निजी विद्यालय रहेको अनुमान छ । ‘विद्यालयको नाममा ब्यापार गर्ने र राजश्व समेत छल्ने यस्ता अबैध संस्थालाई तत्काल बन्द गर्छु,’ कर्णले भने ‘शिक्षामा अनियमितता सामुदायिकमा मात्रै छैन निजीमा झन् डरलाग्दो छ ।’
शिक्षा क्षेत्रमा भ्रष्टाचार र अनियमितता ब्याप्त रहेको तराईका आठ जिल्ला मध्ये महोत्तरी पनि एक हो । ‘जिल्लाकै छवी विर्गेको अवस्थामा केही सुधार गर्न सक्छौंकी भनेर एकिकृत रुपमा आकस्मिक छड्के गरिएको हो’ कर्णले भने ।