बागलुङ, मङ्सिर १४ गते । यहाँको एक विद्यालयमा शिक्षक अभाव देखिएको छ ।
तमान–८ को सरस्वती निम्नमाध्यमिक विद्यालय पाँच शिक्षकको भरमा चलेको छ । यसअघि सात शिक्षक रहेकामा दुई जनाले अवकाश लिएपछि पठनपाठन प्रभावित भएको छ । प्राथमिक तहका पाँच शिक्षकको दरबन्दी रहे पनि निमावि भने निजी स्रोतबाट चलेको विद्यालयले जनाएको छ ।
दरबन्दीका शिक्षक ज्ञानेन्द्र छन्त्यालले गत असोजदेखि अवकाश लिएको र अर्का एक निजी स्रोतमा रहेका शिक्षकलाई विद्यालयले हटाएपछि शिक्षक सङ्ख्या घटेको हो । दुई सय पचास विद्यार्थीले अध्ययन गर्ने उक्त विद्यालयमा शिक्षक कम हुँदा समस्या भएको प्रअ कुमबहादुर छन्त्यालले बताउनुभयो ।
“शिक्षक थोरै हुँदा समस्या भएको छ, एउटै शिक्षकले दोब्बर कक्षा लिनुपर्ने अवस्था छ”– प्रअ छन्त्यालले भन्नुभयो–‘निमावि तहका एउटा दरबन्दी नहुँदा निजी स्रोतबाट तलब खुवाउन पनि धौ–धौ छ ।” विद्यालयले गत वर्ष भएको दरबन्दी मिलानमा एउटा प्रावि तहको शिक्षक पाएको थियो । जिल्ला शिक्षा कार्यालयले आवश्यक व्यवस्था गरिदिएमा सहज हुने प्रअ छन्त्यालले भनाइ छ । रासस