काठमाडौँ । प्राविधिक विषय लिएर एसएलसी परीक्षाको तयारी गरिरहेका विद्यार्थीहरुले पारिश्रमिक सहितको कार्यगत तालिमको अवसर पाउने भएका छन् ।
सरकारले उनीहरुलाई एसएलसी परीक्षा सकिए लगत्तै एक महिने कार्यगत तालिम (अन द जब टे«निङ) दिँदैछ । तालिम ३० दिनको हुनेछ ।
पाठ्यक्रम विकास केन्द्रका उपनिर्देशक बाबुराम गौतमले कार्यगत तालिम अवधिमा प्रतिविद्यार्थी १० हजार रुपियाँ दिने प्रस्ताव गरिएको जानकारी दिँदै भन्नुभयो, “कार्यगत तालिमका अवधिमा काम गर्दा विद्यार्थीले सित्तैमा परिश्रम खर्च गर्नुनपरोस् भनेर न्यूनतम भए पनि पारिश्रमिक दिने व्यवस्था गर्न लागेका हौँ । तालिमसम्बन्धी कार्यविधि तयार गरिरहेका छौँ ।” उहाँका अनुसार यस्तो पारिश्रमिक आगामी वर्षहरुमा पनि प्रदान गरिनेछ र शिक्षा विभागसँग सहकार्य गरी कार्यविधि तयार गरिँदैछ ।
यस वर्षबाट पहिलो पटक प्राविधिक विषयका विद्यार्थीहरु एसएलसी परीक्षामा सम्मिलित हुँदैछन् । देशभरिका ९९ सामुदायिक विद्यालयका करिव साढे चार हजार विद्यार्थीहरु परीक्षामा सम्मिलित हुँदैछन् । प्राविधिक एसएलसीमा सिभिल इन्जिनियरिङ, इलेक्ट्रिकल इन्जिनियरिङ, पशुविज्ञान, बालीविज्ञान र कम्प्युटर गरी पाँच विषयमा पठनपाठन भइरहेको छ ।
प्राविधिक विषयमा एक हजार पूर्णाङ्क तोकिएको छ भने ६० प्रतिशत प्रयोगात्मक र ४० प्रतिशत सैद्धान्तिक विषयको परीक्षा हुनेछ ।
उपनिर्देशक गौतमले कार्यगत तालिमवापत अतिरिक्त अङ्क प्रदान गर्ने व्यवस्था नभएको तर प्रमाणपत्रमा तालिम पूरा गरेको भनि उल्लेख हुने जानकारी दिनुभयो ।
सम्बन्धित विद्यालयले संस्थाहरुको खोजी गरी आफ्ना विद्यार्थीलाई कार्यगत तालिमका लागि खटाउनुपर्ने हुन्छ ।