सन्तोष थापा
पर्वत, १८ जेठ
विनाशकारी भूकम्पले भत्काएका र क्षति पुगेका विद्यालयका लागि अस्थायी टहरा बनाउन जिल्लामा सेनाले अभियान चलाएको छ । पर्वतस्थित रणदल गुल्मले यस्तो अभियान थालेको हो । अहिलेसम्म पाँच विद्यालयका लागि टहरा निर्माण गरिसकेको गुल्मले जनाएको छ । जसमध्ये तिलाहार गाविसस्थित गिज्यानमाको तुलोदय माविको १३ कोठा बनेका छन् । त्यस्तै रानीपानी गाविसका चार विद्यालय पुनर्निर्माण भएको छ ।
भूकम्पले पर्वतका एक सय ३९ विद्यालयका एक सय ८६ कक्षाकोठा पूर्ण रूपमा ध्वस्त भएका छन् । त्यस्तै एक सय ९२ आंशिक र दुई सय दुई सामान्य गरी ६ सय ४२ कक्षाकोठामा क्षति पुगेको जिल्ला दैवी प्रकोप उद्धार समिति पर्वतको तथ्यांकमा उल्लेख छ । विद्यालय पुनर्निर्माणका लागि सेनालाई विद्यालय र अभिभावकले समेत अनुरोध गर्ने गरेको गुल्मपति उज्ज्वल केसीले बताए । ‘विद्यालयका शिक्षक र अभिभावक आफैँ उपस्थित भएर पुनर्निर्माणमा सघाइदिन भन्दै निवेदन दिने गर्नुभएको छ,’ उनले भने, ‘कतिपय जिल्ला प्रशासन कार्यालय पर्वतमा आएका निवेदनलाई प्रमुख जिल्ला अधिकारीको अनुरोधमा पुनर्निर्माणमा लागेका छौँ ।’ पुनर्निर्माणका लागि सेनाको टोली गाउँमा नै श्रमशिविर सञ्चालन गरेर बसेको केसीले बताए । विद्यालय भवन भत्केपछि पठनपाठन नै बन्द गरेर बस्न बाध्य अभिभावक र शिक्षक अहिले सेनाको सहयोगमा टहरा निर्माण भएपछि शैक्षिक क्रियाकलापसमेत सञ्चालन भएका छन् । वर्षायाम सुरुवात हुन लाग्दा भवन भत्केकाले पठनपाठन अवरुद्ध नहोस् भनेर अभियान चलाएको केसीले बताए ।
सेनाले भूकम्प गएलगत्तै जिल्लाका विभिन्न गाउँ पुगेर भत्किएका संरचनाभित्रबाट सामग्री निकाल्नेदेखि स्थानीयवासीलाई सुरक्षित स्थानको प्रबन्ध गर्नेसम्मको काम गरेको थियो । सेनाले जोखिमपूर्ण संरचना भत्काउने काम पनि गरिरहेको छ ।
Source: http://www.enayapatrika.com/