पर्वत, १० श्रावण
मानो रोपेर मुरी उब्जाउने समयमा यहाँको एक गाउँका बासिन्दाहरु गल, गैची र बेल्चा बोकेर विद्यालय जान थालेका छन् । गत बैशाख १२ र २९ गते गएको महाभुकम्पले क्षतिग्रस्त भएको जिल्लाको देउपुर गाविसमा रहेको जननेत्र उमाविका भवनहरु पुन निर्माणका लागि स्थानीय बासिन्दा र अभिभावकहरु लगातार चार दिनदेखि श्रमदानमा जुटेका हुन् । बर्षे बिदापछि विद्यालय खुले पनि विद्यार्थीहरु बस्ने कक्षाकोठाको अभाव भएपछि भवन पुन निर्माणको लागि अभिभावकहरु पालो लगाएर श्रमदानका लागि विद्यालय आउन थालेका छन् । दैनिक पचास जना भन्दा बढी अभिभाबक र स्थानीय बासिन्दाहरु श्रमका लागि आउने गरेको विद्यालय पुननिर्माण समितिका संयोजक अमृत प्रसाद चापागाईले जानकारी दिनुभयो । छिटो भन्दा छिटो कक्षाकोठाहरु पुन निर्माण गरी पठन पाठनलाई सहज बनाउने लक्ष्यका साथ काम भइरहेको चापागाईले बताउनु भयो ।
भुकम्पले विद्यालयका दुई ओटा भवन पूर्ण रुपले क्षतिग्रस्त भएका कारण कक्षाकोठाहरुको अभाव भएपछि विद्यालयले उमावि तहको भवनमा मावि तहका कक्षाहरु संचालन गर्दै आइरहेको थियो । तर साउन देखि उमावि तहका कक्षाहरु पनि तुरुन्त संचालन गर्नु पर्नेमा पर्याप्त कक्षाकोठाहरुको अभावमा सो तहको पठनपाठन सुचारु गर्न कठिन भैरहेको विद्यालयका प्राचार्य दिपक शर्माले बताउनु भयो ।
भुकम्पले क्षति पुर्याएका भवनहरुको पुननिर्माणका लागि सबै सरोकारवालाहरुसँग अनुरोध गरिएको बताउँदै विद्यालय व्यवस्थापन समितिका अध्यक्ष कृष्ण बहादुर गुरुङले सो कार्यमा भुतपूर्व बिद्यार्थी र अभिभावक एवं स्थानीय बासिन्दाहरुले देखाएको उत्साहजनक सक्रिय सहभागिताले विद्यालय भवनहरुको पुननिर्माण कार्य छिट्टै सुसम्पन्न हुने विश्वास व्यक्त गर्नुभयो । दुई ओटा भवनहरु पुननिर्माणको लागि हाल अमेरिकामा अध्ययनरत भुतपूर्व विद्यार्थी दिपेन्द्र चापागाईको सक्रियतामा आर्थिक, प्राविधिक र भौतिक सहयोग जुटाई निर्माण कार्य शुरु भैरहेको विद्यालयले जनाएको छ ।
