मान्छे
गुनको बदला बैगुनले नै तिर्ने गर्छ मान्छे ।
जस्ले भलो गर्छ उस्लाई पिर्ने गर्छ मान्छे ।।
अलिकति लाभ हुने भयो भने मात्र पनि ।
आफ्नैले आफ्नैको छाती चिर्ने गर्छ मान्छे ।।
अहो कस्तो अचम्म छ मनुष्यको स्वार्थ ।
जता अबसर देख्छ उतै छिर्ने गर्छ मान्छे ।।
स्वार्थमा कतै अबरोध हुन थाल्यो भने ।
नानाथरि शस्त्र अस्त्र भिर्ने गर्छ मान्छे ।।
जब जब चारै तिरबाट अलगाबमा पर्छ ।
अनि सबको नजरबाट गिर्ने गर्छ मान्छे ।।
२०७४/०७/०७
गजल
जो चोर उस्कै ठूलो स्वर हुन्छ यहाँ ।
स्वघोषित ठालु कामचोर हुन्छ यहाँ ।।
चतुर त कानून भन्दा माथि बसे भो ।
सोझोलाई नियम कठोर हुन्छ यहाँ ।।
समयको हिसाब फरक पर्न थालेपछि ।
गणितको जोर पनि बिजोर हुन्छ यहां ।।
जताततै दुर्जनहरुको राज बढ़े पछि ।
ईमान्दार सज्जनलाई बोर हुन्छ यहां ।।
जब अत्याचारले सीमा नाघ्न थाल्छ ।
अनि बल्ल युद्ध घन घोर हुन्छ यहाँ ।।
२०७४/०७/०७