गजल

गजल

यो दुनियामा पढ्ने भन्दा पिउने धेरै छन् ।
सायद त्यसैले मर्ने भन्दा जिउने धेरै छन् ।।
उजाड छन् तनहरु फाटेका छन् मनहरु ।
टाल टुल गरी ब्यथाहरु  सिउने धेरै छन् ।।

कविताहरु लेखिरहेछु तर म कवि होइन ।
कुना कन्दरा देखिरहेछु तर म रवि होइन ।।
कवि र रवि दुवै हुन सक्दिन म प्रियजन ।
चाकडी गर्दै अघि बढ्ने मेरो छवि होईन ।।

गजल

नाना थरी कुरा कानमा भर्छन् अचेल मान्छेहरू ।
खोलो तर्यो लौरो बिर्स्यो गर्छन् अचेल मान्छेहरू ।।

के हो झुठ के हो सत्य छुट्याउनै  मुश्किल छ ।
असत्य रूपी भ्रमहरु छर्छन् अचेल मान्छेहरू ।।

जालझेल, षड्यन्त्रको पर्दाफास हुन थालेपछि ।
विश्वासको शिखरबाट झर्छन् अचेल मान्छेहरू ।।

मुटु भित्र घुसेपछि  माहुरीले झै रस चुसेपछि ।
किन फरक कित्तामा  सर्छन् अचेल मान्छेहरू ।।

अर्कैको छ डाहा इर्ष्या आफ्नो पन केही छैन ।
सायद रिसले जलेर मर्छन् अचेल मान्छेहरू ।।
२०७६/०५/२७