गजल
दुब्लाएको ज्यान थोरै मोटो भएको छ ।
हिजो लाउने दौरा आज भोटो भएको छ ।।
नौलो फेशन देखाउंदै हिड्यो नभन्नु है ।
हिजो ठिक्क हुने लुगा छोटो भएको छ ।।
हिजो रित्तो घैटो पनि उठाउन सकिएन ।
आज भरिएको गाग्री लोहोटो भएको छ ।।
जिन्दगीमा कहिल्यै यो मोटाउंदैन भन्थ्यौ ।
मलाई हेर्ने तिम्रो नजर खोटो भएको छ ।।
२०७४/०१/०९
गजल
मुसु मुसु हास्दै हास्दै ओठ टोकेर आईन् ।
लजाउंदै र सर्माउंदै मुहार छोपेर आईन् ।।
अर्कैसँग लगनगाँठो कस्दिन खोजेपछि ।
जन्मघर छाडी सुइंकुच्चा ठोकेर आईन् ।।
चिना हेर्दा मिले पनि मन मिल्न सकेनछ ।
गन्तब्यको त्यो यात्रा बिचमै रोकेर आईन् ।।
चिना बिहिन मान्छे हूँ म मन हराएको छैन ।
मनको राजा भन्दै उनी आशा बोकेर आईन् ।।
निरस यो एक्लो जीबन जेनतेन गुज्रीदैथ्यो ।
मूल्यहीन मेरो दिलको मूल्य तोकेर आईन् ।।
२०७४/०१/०९
मुक्तक
यो दुनियामा पढ्ने भन्दा पिउने धेरै छन् ।
खै किन पिउँदा पिउँदै जिउने धेरै छन् ।।
उजाड छन् तनहरु फाटेका छन् मनहरु ।
टाल टुल गरी ब्यथाहरु सिउने धेरै छन् ।।
२०७६/०१/०९
मुक्तक
उठ उज्यालो भो आलस्य भगाऊ ।
हर क्षण तिम्रो सद् कर्ममा लगाऊ ।।
सुतिरहेछन् बस्ती अँध्यारो छ भनी ।
छरिदेऊ लाली किरण सबै जगाऊ ।।
२०७६/०१/०९
शुभप्रभात